اسلام آباد۔ 30 ستمبر(اے پی پی)سپیشل جج سنٹرل اسلام آباد ہمایوں دلاور اے پی پی میگا کرپشن کیس اچ گرفتار تھئے پنج نامزد ملزمان دی درخواست ضمانت بعد از گرفتاری تے سماعت کل (بدھ) تئیں ملتوی کر ݙتی۔ منگل کوں کیس دی سماعت دے شروع تھیوݨ تے عدالت کوں ݙسایا ڳیا جو ملزمان دی ضمانت دیاں درخواستاں تے نوٹس جاری نئیں تھئے۔ اے پی پی دے لیگل ایڈوائزر خرم بیگ عدالت اچ پیش تھئے اتے موقف اپنایا جو انہاں کوں کیس دی اطلاع ویلھے سر نئیں ݙتی ڳئی جیندی وجہ توں او تیاری نئیں کر سڳے۔ سماعت اچ فاضل جج عدالتی اہلکاراں توں پچھیا جو بھلا اے پی پی کوں نوٹس جاری کیتے ڳئے ہن یا نئیں؟ عدالتی اہلکار ݙسایا جو کل رات ٹیلی فون کال دے ذریعے اطلاع ݙتی ڳئی ہئی۔ ایں ولدے تے فاضل جج ہمایوں دلاور کوڑیندے ہوئے متعلقہ عدالتی اہلکار کوں شو کاز نوٹس جاری کر ݙتے۔ بعد اچ عدالت سماعت بدھ تئیں ملتوی کر ݙتی۔ واضح راہوے جو اے پی پی میگا کرپشن کیس اچ گرفتار ملزمان محمد غواث خان، ادریس احمد، ساجد علی وڑائچ، خرم شہزاد اتے عمران منیر آپݨی ضمانت بعد از گرفتاری کیتے درخواستاں دائر کیتاں ہوئن۔
