اسلام آباد۔2اکتوبر (اے پی پی) وفاقی وزیر تعلیم و پیشہ ورانہ تربیت ڈاکٹر خالد مقبول صدیقی نال عمان دے سفیر فہد خلف الخروصی دی اسلام آباد وچ اہم ملاقات تھئی جیندے وچ ݙوہیں ملکاں وچال تعلیم دے شعبے وچ تعاون ودھاوݨ تے زور ݙتا ڳیا۔ ملاقات دے دوران وفاقی وزیر ڈاکٹر خالد مقبول صدیقی آکھئے جو پاکستان تے عمان دے تعلقات تاریخی، ثقافتی تے سانجھے احترام دی بنیاداں تے قائم ہن تے تعلیم دے شعبے وچ باہمی اشتراک نہ صرف ݙونہاں اقوام وچال قربت ودھیسی بلکہ خطے وچ استحکام دا وی ذریعہ بݨسی۔ ڈاکٹر خالد مقبول صدیقی ایں ڳالھ تے زور ݙتا جو عربی زبان دی تدریس، ٹیکنیکل تے ووکیشنل ایجوکیشن اینڈ ٹریننگ (ٹیوٹ) جیہے شعبیں وچ عمان دے تجربیں کنوں فیدہ چاتا ونڄ سڳدے۔ انہاں آکھئے جو قرآن پاک دی بہتر سمجھ کیتے عربی زبان دی تعلیم کوں سکولاں تے کالجاں وچ ودھارا ݙتا ویسی۔ انہاں تجویز ݙتی جو عربی ادب کوں اردو وچ تے پاکستانی ادب کوں عربی وچ ترجمہ کرتے نہ صرف علم دا تبادلہ ممکن بݨایا ونڄ سڳدے بلکہ ݙونہاں ملکاں دے عوام وچال ثقافتی ہم آہنگی کوں وی ودھارا ݙتا ونڄ سڳدے عمانی سفیر فہد خلف الخروصی آکھئے جو عمان جدیدیت کوں اپنائے تے اپݨی ثقافت کوں محفوظ رکھیندے ترقی دا سفر جاری رکھئے۔ انہاں ݙونہاں ملکاں دی وزارت تعلیم وچال تعاون ولدا مستحکم بݨاوݨ دا یقین ݙیوائے وفاقی وزیر کوں اپݨے دفتر دے دورے دی دعوت وی ݙتی۔ ملاقات وچ 2019ء کنوں اڄ تئیں دستخط تھئے مفاہمتی یادداشتاں تے تھئے پیش رفت دا وی جائزہ ڳھدا ڳیا جیڑھے تعلیم دے شعبے وچ مشترکہ کوششاں دا مظہر ہن۔ اے ملاقات نہ صرف ݙوہیں ملکاں دے پراݨے تعلقات دی عکاس ہئی بلکہ مستقبل وچ تعلیمی میدان وچ نویں امکانات دی نوید وی گھن کے آئی اے۔
