اسلام آباد۔23مارچ(اے پی پی) وزیراعظم محمد شہباز شریف آکھیے قابل تجدید توانائی دا ودھارا حکومت دی ترجیح اے،شمسی توانائی دے حوالے نال حکومت دی پالیسی تے ترجیحات اچ کوئی تبدیلی نی آئی ،پاور سیکٹر اچ اصلاحات دی بدولت عوام کوں بجلی دیاں قیمتاں اچ مزید ریلیف ݙیسوں ۔وزیراعظم آفس پریس ونگ توں اتوار کوں جاری اعلامیہ موجب وزیراعظم محمد شہباز شریف دی صدارت اچ پاور ڈویژن دے امور تے اہم جائزہ اجلاس اتوار تھیا ۔ایں موقع تے وزیراعظم آکھیے قابل تجدید توانائی دا ودھارا حکومت دی ترجیح اے ۔ انہاں متعلقہ حکام کوں سولرآئزیشن پالیسی دے حوالے نال عوام اچ پاتے ونڄݨ آلے ابہام کوں حقائق تے اعدادوشمار دی بنیاد تے ہٹاوݨ دی ہدایت کریندے آکھیے شمسی توانائی دے حوالے نال حکومت دی پالیسی اتے ترجیحات اچ کوئی تبدیلی کائنی آئی ۔وزیراعظم آکھئے جنریشن کمپنیاں دے خاتمہ دے حوالے نال ساری قانونی اتے ٻئے امور وختی طے کیتے ویسن ۔ وزیراعظم بجلی دی تقسیم کار کمپنیاں دی نجکاری دا عمل تکھا کرݨ دی ہدایت کریندے آکھئے بجلی دے نرخاں اچ کمی دے حوالے نال ھک جامع اتے مؤثر حکمت عملی دے تحت پیکج تیار کیتا ویندا پئے جیں دا اعلان وختی کرݙتا ویسی ،پاور سیکٹر اصلاحات دی بدولت عوام کوں بجلی دیاں قیمتاں اچ مزید ریلیف ݙیسوں ۔ وزیراعظم توانائی دے شعبے دے حوالے نال جامع حکمت عملی بݨاوݨ سانڳے پاور ڈویژن ، آبی وسائل ڈویژن اتے پیٹرولیم ڈویژن اچ آہنگی کوں مزید بہتر بݨاوݨ دی ہدایت کیتی۔ اجلاس اچ وفاقی وزیر پاور ڈویژن سردار اویس احمد لغاری ، وزیراعظم دے مشیر ڈاکٹر توقیر شاہ اتے متعلقہ اعلیٰ سرکاری افسراں شرکت کیتی جݙاں جو وفاقی وزیر اقتصادی امور احد خان چیمہ اتے وزیراعظم دے مشیر محمد علی بذریعہ وڈیو لنک اجلاس اچ شرکت کیتی۔
.jpg)
