اسلام آباد۔8اکتوبر(اے پی پی) وفاقی وزیرمنصوبہ بندی ترقی واصلاحات وخصوصی اقدامات پروفیسر احسن اقبال آکھیے جو سی پیک دے ݙوجھے مرحلے (فیز ٹو) دا باضابطہ آغاز تھی چکئے، جیں اچ زراعت، صنعت، اطلاعاتی ٹیکنالوجی اتے عوامی رابطے جیھے کلیدی شعبیں کوں شامل کیتا ڳئے، ایں مرحلے اچ نجی شعبے دے کردار کوں مزید مؤثر بݨاوݨ اتے نینگراں دی ہنرمندی اچ وادھا تے خصوصی توجہ ݙتی ویندی پئی اے۔ 14ویں جے سی سی اجلاس دے بعد سی پیک منصوبیں تے پیش رفت دا جائزہ اجلاس سݙیا ڳیا۔ اجلاس اچ سی پیک فیز ٹو دے منصوبیں تے عمل درآمد اچ تیزی گھن آوݨ تے زور ݙتا ڳیا۔ اجلاس اچ وفاقی وزیر ہدایت کیتی جو پاکستان اچ قائم کیتے ونجݨ آلے خصوصی اقتصادی زونز اچ سہولتاں ݙیوݨ یقینی بݨایا ونڄے اتے ساریاں وزارتاں سی پیک فیز ٹو دے تحت نویں منصوبے تیار کرن۔احسن اقبال آکھیا جو 14واں جے سی سی اجلاس پاکستان اتے چین دے تعلقات اچ نویں سفر دی بنیاد ثابت تھئے جݙاں جو پاکستان اتے چین دے تعلقات دی 75ویں سالگنڈھ دے موقع تے 15واں جے سی سی اجلاس پاکستان اچ منعقد تھیسی۔ انہاں ہدایت کیتی جو انہاں منصوبیں کوں ترجیح ݙتی ونڄے جو عوامی زندگی تے دیرتئیں اتے مثبت اثر پا سڳن۔ وفاقی وزیر آکھیا جو سی پیک دے منصوبے روزگار، سرمایہ کاری اتے ٹیکنالوجی دی منتقلی دے موقع ݙیندے پئن جݙاں جو فیز ٹو پاکستان دی برآمدات اچ کافی اتے پائیدار ودھارا گھن آسی۔ انہاں آکھیا جو پاکستان دے فائیو ایز ماڈل کوں چین دیاں پنج راہداریاں دے نال ہم آہنگ کیتا ویندا پئے، تاں جو ݙوہائیں ملکاں وچال اقتصادی تعاون کوں مزید وسعت ݙتی ونڄ سڳے۔وفاقی وزیر مزید آکھیا جو چین دے تعاون نال گوادر اچ قائم ڈی سیلینیشن پلانٹ پاݨی ݙیوݨ اچ نمایاں بہتری پیدا کیتی اے۔ انہاں عزم ظاہر کیتا جو جیویں سی پیک فیز ون کوں کامیابی نال پورا کیتا ڳئے، فیز ٹو کوں وی اوں ہی جوش اتے تسلسل نال کامیاب بݨیسوں۔ انہاں ݙسایا جو معاشی و روزگار کاریڈور دے تحت پسماندہ علاقیں دی ترقی کیتے چینی ماڈل تے عمل درآمد دا فیصلہ کیتا ڳئے، جݙاں جو پاکستان اتے چین دے اقتصادی تھنک ٹینکس ’’ ڈویلپمنٹ ریسرچ سینٹرز ‘‘ دے وچال مفاہمتی یادداشت وی طے تھی ڳئی اے، جیں نال برآمدات دے ودھارے اچ مدد ملسی۔
