اسلام آباد۔ 17 جون (اے پی پی) وزیر اعظم محمد شہباز شریف آکھیا جو پاکستان ریلوے ملکی معیشت اتے مواصلات دی ریڑھ دی ہڈی دی حیثیت رکھیندے، اے نقل و حمل دا ہک سستا، تیز اتے ماحول دوست ذریعہ اے۔ ریکوڈک کوں ریلوے نیٹ ورک نال جوڑن نال بلوچستان دے مائنز اینڈ منرلز دے شعبے دی ترقی تھیسی اتے علاقے دے عوام کیتے روزگار دے نویں موقع پیدا تھیسن۔ پی ایم آفس دے میڈیا ونگ توں جاری بیان دے مطابق وزیر اعظم محمد شہباز شریف اے ڳالھیں آپݨی صدارت اچ پاکستان ریلوے دی اپ گریڈیشن اتے ایندی ریکوڈک تئیں توسیع بارے منگل کوں تھیوݨ آلے ہک اعلیٰ سطحی اجلاس نال خطاب کریندیں ہوئیں کیتا۔ اجلاس وچ مستقبل دی کارگو اتے نقل و حمل دیاں ضرورتاں دے پیش نظر پاکستان ریلوے دی ترقی بشمول ایم ایل ون اتے ایم ایل تھری دی اپ گریڈیشن بارے بریفنگ ݙتی گئی۔ وزیر اعظم 2028 تئیں ریکوڈک کوں ریلوے لائن نیٹ ورک نال جوڑݨ دی ہدایت کیتی۔ انہاں ریلوے دی اپ گریڈیشن اتے ترقی کیتے فنانسنگ دے حوالے نال بین الوزارتی کمیٹی ٻݨاوݨ دی ہدایت کریندیں ہوئیں آکھیا جو کمیٹی پاکستان ریلوے دی ترقی اتے ایندی ریکوڈک تئیں توسیع کیتے درکار فنانسنگ دے حوالے نال ٹھوس تجویزاں پیش کریسی۔ وزیر اعظم آکھیا جو پاکستان ریلوے ملکی معیشت اتے مواصلات دی ریڑھ دی ہڈی دی حیثیت رکھیندے، ریلوے نقل و حمل دا ہک سستا، تیز اتے ماحول دوست ذریعہ اے، ریکوڈک کوں ریلوے نیٹ ورک نال جوڑن نال بلوچستان دے مائنز اینڈ منرلز دے شعبے دی ترقی تھیسی اتے علاقے دے عوام کیتے روزگار دے نویں موقع پیدا تھیسن۔ اجلاس وچ نائب وزیر اعظم اتے وزیر خارجہ محمد اسحاق ڈار، وزیر دفاع خواجہ محمد آصف، وزیر اقتصادی امور احد خان چیمہ، وزیر بحری امور جنید انور چوہدری، وزیر ریلوے حنیف عباسی، وزیر مملکت برائے ریلوے بلال اظہر کیانی، معاون خصوصی طارق فاطمی اتے اعلیٰ سرکاری حکام شامل ہن۔
