جلال پورپیروالہ/ملتان20ستمبر (اے پی پی) وفاقی وزیر پٹرولیم علی پرویز ملک جلال پور پیروالہ دا دورہ کیتا اتے اڄوکی چھل پاروں متاثرہ 36 انچ قطر دی گیس پائپ لائن دے مرمتی کم دا تفصیلی جائزہ ڳھدا۔ ایں موقع تے انہاں دے رلے ایم ڈی سوئی نادرن، وفاقی سیکرٹری پٹرولیم مومن آغا، تے ٻئے اعلیٰ حکام وی موجود ہن۔ وفاقی وزیر پٹرولیم آکھیا جو عوام کوں سہولتاں ݙیوݨ تے تحفظ حکومت دی اولین ترجیح اے اتے کہیں وی ہنگامی صورت حال وچ وقتی رد عمل کیتے سارے متعلقہ ادارے مکمل الرٹ ہن۔ انہاں ݙسایا جوچھل دے خطرے پاروں مذکورہ پائپ لائن کوں وقتی حفاظتی اقدامات دے تحت آئسولیٹ کر ݙتا ڳیا ہائی تاں جو کہیں قسم دے جانی یا مالی ضیان کنوں بچیا ونڄ سڳے۔ انہاں آکھیا جو متبادل پائپ لائن دے ذریعے گیس دی سپلائی بلا تعطل جاری اے۔ وفاقی وزیر موقع تے موجود سوئی ناردرن گیس مینجمنٹ کوں ہدایت کیتی جو گیس دے ترسیلی نظام دی مسلسل نگرانی کوں یقینی بݨایا ونڄے تاں جو چھل دی صورت حال پاروں کہیں وی ممکنہ خرابی نال وقتی طور تے نبڑیا ونڄ سڳے۔ ایں موقع تے کمشنر ملتان عامر کریم خان وفاقی وزیر پٹرولیم کوں جلال پور پیروالہ وچ جاری چھل ریلیف اینڈ ریسکیو آپریشن تے بریفنگ ݙتی۔ انہاں ݙسایا جو موٹروے دے متاثرہ حصے دی بحالی دا کم باری مشینری دی مدد نال ݙینھ رات جاری اے، تاں جو زمینی رابطہ وقتی بحال کیتا ونڄ سڳے
