لاہور (اے پی پی) وفاقی وزیر و چیئرمین کشمیر کمیٹی رانا قاسم نون آکھیے جو پاکستان، خاص کر بلوچستان اچ فتنہ ہندستان فساد کھڑا کریندا پئے۔ انہاں آکھیا جو بلوچستان اچ اڄوکی دہشت گردی دا ذمے وار بھارت اتے مودی سرکار ہن۔ ملتان پریس کلب اچ میڈیا نال ڳالھ مہاڑ کریندے وفاقی وزیر دا آکھݨ ہئی جو بلوچستان اچ اساݙے نشوم لوکاں کوں شہید کیتا ویندا پئے جیں دی ذمے وار مودی سرکار اے۔ ایں مداخلت کوں وختی بند کیتا ونڄے۔چیئرمین کشمیر کمیٹی رانا قاسم نون آکھیا جو مقبوضہ کشمیر اتے غزہ اچ انسانی حقوق دی پامالی تے پوری دنیا کوں نوٹس گھنݨا ہوسی۔ بھارت کوں اے ڄاݨ گھنݨا چاہیدے جو کشمیر پاکستان دا حصہ اے اتے رہسی۔ پاکستان کشمیر دے بغیر ادھورا اے۔ کشمیر دا مسئلہ ہݨ صرف پاکستان اتے بھارت وچال کائنی بلکہ ہݨ اے ہک بین الاقوامی مسئلہ اے جیں کوں ہر صورت اقوام متحدہ دیاں قرارداداں موجب حل تھیوݨا چاہیدے۔رانا قاسم نون کشمیری حریت رہنماواں کوں خراج تحسین پیش کریندے آکھیا جو انہاں دیاں قربانیاں کݙاہیں وی ضائع نہ ویسن، پوری قوم سید شبیر احمد شاہ، یاسین ملک، سید علی گیلانی اتے ݙوجھے رہنماواں دی جدوجہد آزادی کوں سلام پیش کریندی اے۔رانا قاسم نون پہلگام واقعے تے ڳالھ کریندے آکھیا جو پاکستان ایں دی غیر جانبدارانہ انکوائری دی پیشکش کیتی پر بھارت ہٹ دھرمی دا مظاہرہ کیتا اتے جنگ کوں ترجیح ݙتی، جیں اچ مودی کوں شکست دا سامݨا کرݨا پیا۔ ایں عظیم فتح تے پوری پاکستانی قوم اتے دنیا وزیراعظم شہباز شریف، فیلڈ مارشل جنرل عاصم منیر اتے افواجِ پاکستان کوں خراجِ تحسین پیش کیتے۔جنوبی پنجاب دیاں محرومیاں دے حوالے نال انہاں دا آکھݨ ہئی جو اتھاں دے مسئلیں کیتے اساں ہمیشہ آواز چاتی۔ جے ہک صوبہ بݨایا ڳیا تاں ݙوجھے وی بݨاوݨے پوسن ۔ جنوبی پنجاب دا بنیادی مسئلہ اتھاں غربت اتے پسماندگی مکاوݨ اے، جیں کیتے کوششاں جاری ہن۔ رانا قاسم نون آکھیا جو اتھاں دے کساناں دی اوکھ دا اندازہ اے، جیں دی بنیادی وجہ موسمیاتی تبدیلی اے۔ حکومت ایں حوالے نال اقدامات کریندی پئی اے، کیوں جو زرعی ترقی دے بغیر اساں اڳوں نئیں ودھ سڳدے۔
