راولپنڈی۔ 3 جون (اے پی پی)سکیورٹی فورسز بلوچستان اچ ݙو انڄ انڄ کارروائیاں اچ بھارتی پراکسی فتنہ الہندوستان نال تعلق رکھݨ آلے 7 دہشت گرداں کوں ہلاک کر ݙتے۔ پاک فوج دے شعبہ تعلقات عامہ توں جاری بیان موجب بلوچستان اچ ضلع کچھی دے علاقہ مچھ اچ فتنہ الہندوستان دے دہشت گرداں دی موجودگی دی اطلاع تے کارروائی کیتی ڳئی۔ آپریشن دے دوران سکیورٹی فورسز فتنہ الہندوستان دے دہشت گرداں دے ٹھکاݨے دا مؤثر طریقے نال گھیراؤ کیتا اتے شدید فائرنگ دے تبادلے دے بعد 5 ہندوستانی حمایت یافتہ دہشت گرداں کوں جہنم واصل کر ݙتا ڳئے۔ ضلع قلات دے علاقے مارگنڈ اچ کیتے ڳئے ہک ݙوجھے انٹیلی جنس دی بنیاد تے کارروائی اچ فتنہ الہندوستان دہشت گرداں دے ٹھکاݨے دا پتہ لاتے 2 دہشت گرداں کوں کامیابی نال ہلاک کر ݙتا ڳیا۔ ماریے ڳئے فتنہ الہندوستان دے دہشت گرداں توں اسلحہ، گولہ بارود اتے دھماکہ خیز مواد وی برآمد تھئے، جیڑھے کئی دہشت گردانہ سرگرمیاں اچ ملوث ہن۔ پاکستان دی سکیورٹی فورسز ملک توں بھارتی حمایت یافتہ دہشت گردی دے ناسور کوں منڈھوں مکاوݨ کیتے پرعزم ہن اتے بھارتی حمایت یافتہ دہشت گردی دے مرتکب لوکاں اتے انہاں دے سہولت کاراں کوں انصاف دے کچاری اچ گھن آوݨ سانڳے قوم دے غیر متزلزل عزم دا اعادہ کریندن۔
