اسلام آباد۔20جنوری(اے پی پی) وزیراعظم محمد شہباز شریف سکھر-حیدرآباد موٹروے دی تعمیر، رتو ڈیرو-گوادر موٹر وے دے بقیہ حصیں دی تعمیر اتے حیدرآباد- کراچی موٹر وے کراچی-کوئٹہ-چمن قومی شاہراہ، تے قراقرم ہائی وے دے کجھ حصیں دی تعمیر نو دے حوالے نال کم دا جائزہ گھنݨ دے حوالے نال سٹیئرنگ کمیٹی بݨاوݨ ، ھک مہینے اندر موٹر ویز دے سارے حفاظتی جنگلاں دی مرمت دا کم مکمل کرݨ، ایجھے لوک جیڑھے انہاں حفاظتی جنگلاں کوں چوری کریندن یا انہاں جنگلاں کوں مل گھندن انہاں ساریں دے خلاف سخت کارروائی کرݨ تے قومی شاہراہواں اتے موٹر ویز تے پولیسنگ اتے پٹرولنگ بہتر بݨاوݨ دی ہدایات کیتن ۔ وزیراعظم آفس دے پریس ونگ توں جاری بیان موجب وزیراعظم محمد شہباز شریف دی صدارت اچ نیشنل ہائی وے اتھارٹی دے امور تے قومی شاہراہواں اتے موٹرویز تے حفاظتی اقدامات دے حوالے نال انڄ انڄ جائزہ اجلاس تھئے۔ نیشنل ہائی وے اتھارٹی متعلق اجلاس دے شرکاء نال ڳالھ مہاڑ کریندے وزیراعظم آکھیے قومی شاہراہواں تے موٹر ویز قومی ترقی اتے ملکی معیشت اچ ریڑھ دی ہݙی دی حیثیت رکھیندن ، ملک اچ بہترین سفری سہولتاں ݙیوݨ حکومت دی اولین ترجیحات اچ شامل اے۔ وزیراعظم سکھر-حیدرآباد موٹروے دی تعمیر، رتو ڈیرو-گوادر موٹر وے دے بقیہ حصیں دی تعمیر تے حیدرآباد- کراچی موٹر وے کراچی-کوئٹہ-چمن قومی شاہراہ تے قراقرم ہائی وے دے کجھ حصیں دی تعمیر نو دے حوالے نال کم دا جائزہ گھنݨ دے حوالے نال سٹیئرنگ کمیٹی بݨاوݨ دی ہدایت کیتی ۔ وزیراعظم ہدایت کیتی جو انہاں اہم قومی منصوبیں دے حوالے نال تکھے تے ترجیحی بنیاداں تے کم کیتا ونڄے۔ اجلاس کوں قومی شاہراہواں تے موٹر ویز تے جاری ترقیاتی کماں دے حوالے نال بریفنگ ݙتی ڳئی ۔ اجلاس کوں ݙسایا ڳئے جو لاہور – ساہیوال- بہاولنگر موٹروے دے پہلے فیز لاہور – ساہیوال تے کم شروع کیتا ویندا پئے ،پہلے مرحلے اچ لاہور رنگ روڈ توں رائے ونڈ-قصور روڈ زمین مل ڳھدی ویندی پئی اے ، ایں موٹر وے توں جنوب مشرقی پنجاب دے کئی ضلعے فیدہ چا سڳسن ۔قومی شاہراہواں اتے موٹرویز تے حفاظتی انتظامات متعلق اجلاس اچ وزیراعظم موٹر ویز تے سارے حفاظتی جنگلاں دی مرمت دا کم ھک مہینے اندر مکمل کرݨ دی ہدایت کیتی ۔ انہاں مزید ہدایت کیتی جو ایجھے لوک جیڑھے حفاظتی جنگلاں کوں چوری کریندن یا انہاں جنگلاں کوں گھندن انہاں ساریں دے خلاف سخت کارروائی عمل اچ گھن آئی ونڄے ۔ وزیراعظم قومی شاہراہواں تے موٹر ویزتے پولیسنگ اتے پٹرولنگ بہتر بݨاوݨ دی ہدایت کیتی ۔ اجلاس کوں موٹر ویز تے نصب حفاظتی جنگلاں دی چوری روکݨ دے حوالے نال اقدامات تے بریفنگ ݙتی ڳئی ۔ اجلاس کوں ݙسایا ڳئے جو پورے ملک دی موٹرویز تے 4027 کلومیٹرز حفاظتی جنگلے نصب ہن جنہاں اچوں 859 کلومیٹرز حفاظتی جنگلے یا تاں چور تھئن یا انہاں کوں ضیان پجایا ڳئے ، موٹر ویز حفاظتی جنگلاں دی عدم موجودگی پاروں پچھلے چار سالاں اچ 36 حادثات رپورٹ تھئن؛ پچھلے چار سالاں اچ موٹرویز تے حفاظتی جنگلاں دی چوری اتے انہاں کوں ضیان پڄاوݨ دے حوالے نال 178 ایف آئی آرز درج کیتیاں ڳئن ۔ اجلاس کوں مزید ݙسایا ڳئے جو موٹرویز کوں سٹرٹیجک اثاثہ قرار ݙیوݨ سانڳے قانون سازی کیتی ویندی پئی اے جیں دے بعد موٹر ویز کوں ضیان پڄاوݨ آلیں دے خلاف قانون موجب سخت توں سخت کارروائی کیتی ویسی ۔ اجلاس اچ نائب وزیراعظم و وزیر خارجہ اسحاق ڈار ، وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ ، وفاقی وزیر مواصلات عبدالعلیم خان اتے متعلقہ اعلیٰ سرکاری افسراں شرکت کیتی۔
