ڈھاکا۔21اگست (اے پی پی) وفاقی وزیر تجارت جام کمال خان کوں ڈھاکا چیمبر آف کامرس اینڈ انڈسٹری دا دورہ کیتا اتے ڈھاکا چیمبر دے صدر تسکین احمد اتے بورڈ ممبران نال ملاقات کیتی۔ جاری پریس ریلیز موجب ملاقات اچ پاکستان اتے بنگلہ دیش وچال وپار اتے سرمایہ کاری کوں ودھاوݨ دے موقعیں تے تفصیلی ڳالھ مہاڑ کیتی ڳئی۔ پاکستان دے ہائی کمشنر بنگلہ دیش عمران حیدر وی ایں موقع تے موجود ہن۔ وفاقی وزیر تجارت ڈھاکا چیمبر دے فیڈریشن آف پاکستان چیمبر آف کامرس اینڈ انڈسٹری اتے اسلام آباد چیمبر آف کامرس اینڈ انڈسٹری دے نال تعاون دی تعریف کیتی۔ انہاں بزنس ٹو بزنس نیٹ ورکنگ اچ چیمبر دے کردار دی تعریف کیتی اتے ایکسپورٹرز/امپورٹرز ڈیٹا بیس ݙیوݨ تے شکریہ ادا کیتا۔ جام کمال خان ڈھاکا چیمبر کوں نومبر 2025ء اچ کراچی اچ تھیوݨ آلی تریجھی انٹرنیشنل فوڈ اینڈ ایگریکلچرل ایگزیبیشن اچ شرکت دی دعوت وی ݙتی۔ ملاقات اچ قابل تجدید توانائی، دوا سازی، آٹو پارٹس، فاسٹ موونگ کنزیومر گڈز، آئی ٹی، فیشن انڈسٹری اتے نوجواناں دیاں ترجیحات جیھے شعبیں اچ تعاون تے ڳالھ مہاڑ کیتی ڳئی۔ ڈھاکا چیمبر دے صدر تسکین احمد وزیر تجارت کوں ادارے دی تاریخ اتے کاروباری سہولتاں بارے ݙسایا۔ انہاں وفد دے تبادلیں، نمائشاں اچ شرکت اتے نالج شیئرنگ دے ذریعے ݙو طرفہ وپار ودھاوݨ دیاں تجویزاں ݙتیاں۔ انہاں آکھیا جو نِکے اتے درمیانے درجے دے کاروباری اداریں کوں جوڑݨ ݙوہیں ملکاں کیتے فیدہ مند ہوسی۔ ملاقات اچ ٹیرف اتے نان ٹیرف رکاوٹاں دے مسئلیں اتے ݙوہیں ملکاں وچال لاجسٹکس کوں بہتر بݨاوݨ تے وی ڳالھ مہاڑ کیتی ڳئی۔
